ԱԲ-ն բիզնեսում․ տեխնոլոգիայից դեպի մրցակցային առավելություն

Արհեստական բանականությունն այլևս ապագայի տեխնոլոգիա չէ. այն արդեն այսօր փոխում է բիզնեսի կառավարման, վաճառքի, մարքեթինգի և հաճախորդների հետ աշխատանքի ձևերը։

Հունիսի 22-ին Հայաստանի գործատուների հանրապետական միության անդամների համար կազմակերպվեց «ԱԲ-ն Ձեր բիզնեսում․ օգնական, թե՞ գլխացավանք» թեմայով գործնական սեմինար, որը համախմբեց տարբեր ոլորտների գործարարների և կազմակերպությունների ներկայացուցիչների։ Սեմինարի բանախոսներն էին Հայաստանի գործատուների հանրապետական միության անդամ, ոլորտի առաջատար մասնագետներ՝ «Karapp» ընկերության համահիմնադիր Շավարշ Կարապետյանը և «Slice Consulting» ընկերության հիմնադիր Նանե Մաթևոսյանը։

Սեմինարի ընթացքում քննարկվեցին՝

• ինչպես արդյունավետ ինտեգրել արհեստական բանականությունը բիզնես գործընթացներում,
• ինչ հնարավորություններ և ռիսկեր են առաջանում ԱԲ-ի կիրառման արդյունքում,
• ինչպես ընտրել բիզնեսի համար ամենահարմար AI գործիքները,
• ինչպես ավտոմատացնել SMM-ը և բարձրացնել աշխատանքի արդյունավետությունը նորարարական լուծումների միջոցով։

Մասնակիցները ոչ միայն ծանոթացան ժամանակակից AI գործիքներին, այլև ստացան գործնական խորհուրդներ և կիրառելի լուծումներ, որոնք կարող են անմիջապես ներդնել իրենց աշխատանքի ընթացքում։

Կարևորելով Միության անդամ կազմակերպությունների մրցունակության բարձրացումը արագ փոփոխվող տեխնոլոգիական միջավայրում՝ Հայաստանի գործատուների հանրապետական միությունը նման նախաձեռնությունների միջոցով նպատակ ունի նպաստել գործարար համայնքի թվային կարողությունների զարգացմանը, արհեստական բանականության արդյունավետ կիրառմանը և նորարարական տեխնոլոգիաների ինտեգրմանը բիզնեսի առօրյա գործունեության մեջ։ Նմանատիպ գործնական սեմինարներն ունեն շարունակական բնույթ և կազմակերպվում են՝ հիմք ընդունելով Միության անդամների մասնագիտական հետաքրքրությունները, ոլորտային կարիքներն ու ժամանակակից աշխատաշուկայի մարտահրավերները։