ՀԳՀՄ անդամները մասնակցեցին Չինաստանում ՇՀԿ երկրների միջև անդրսահմանային էլեկտրոնային առևտրի զարգացմանը նվիրված սեմինարին

Հայաստանի գործատուների հանրապետական միության անդամներ` Շավարշ Կարապետյանը (ՀԳՀՄ Խորհրդի անդամ), Արփինե Բաբախանյանը, Սոֆյա Խարատյանը, Արման Մարտիրոսյանը և Արտյոմ Գրիգորյանը, հունիսի 12-25-ը մասնակցեցին Չինաստանում անցկացված միջազգային սեմինարին՝ «Շանհայի համագործակցության կազմակերպության (ՇՀԿ) երկրների միջև անդրսահմանային էլեկտրոնային առևտրի զարգացում և համագործակցության հեռանկարները» թեմայով։

Սեմինարը կազմակերպվել էր ՀՀ-ում Չինաստանի դեսպանության բարձր հովանու ներքո և համակարգվում էր Շանդունի արտաքին առևտրի մասնագիտական քոլեջի կողմից, որը Չինաստանում համարվում է արտաքին տնտեսական և առևտրային կրթության առաջատար բարձրագույն ուսումնական հաստատություն։

Սեմինարը համախմբել էր շուրջ 30 մասնակցի ՇՀԿ բոլոր անդամ երկրներից, որը միջմշակութային բացառիկ միջավայր է ստեղծել նոր կապերի, միջազգային համագործակցության և առաջավոր փորձի փոխանակման համար։

Սեմինարի ընթացքում մասնակիցները հնարավորություն ունեցան ուսումնասիրելու ՇՀԿ երկրների միջև արդեն գործող հաջողված էլեկտրոնային առևտրի մոդելները, որոնք ընդգրկում էին միջտնտեսական համագործակցությունը, նորարարական տեխնոլոգիաների ներդրումը և տեղական ու միջազգային շուկաների ինտեգրումը։ Մասնակիցները ծանոթացան նաև միջազգային էլեկտրոնային առևտրի զարգացման գլոբալ միտումներին, որոնց կիրառումը տարբեր տարածաշրջաններում ազդում է տնտեսական աճի վրա, ինչպես նաև նորագույն տեխնոլոգիաներին և մարքեթինգային ռազմավարություններին, որոնք նպաստում են անդրսահմանային առևտրի զարգացմանը։ Ուսումնասիրվեցին Չինաստանի առաջատար լոգիստիկ և վճարային համակարգերի մեխանիզմները, որոնք ապահովում են էլեկտրոնային առևտրի արդյունավետ աշխատանքը և վճարային համակարգերի անվտանգության բարձր մակարդակը։

Դասընթացները համադրված էին նաև մասնագիտական այցերով մի շարք առաջատար արդյունաբերական և էլեկտրոնային առևտրի կենտրոններ, գործարաններ և արտադրամասեր, որտեղ մասնակիցները ծանոթացան նորարարական տեխնոլոգիաներին, միջտնտեսական համագործակցության մոդելներին և շուկաների ինտեգրացված կառավարման պրակտիկային։ Որպես սեմինարի համակարգող` Շանդունի արտաքին առևտրի մասնագիտական քոլեջը նպատակ ուներ ներկայացնել թե՛ տեխնիկական օպերատորային լուծումները, թե՛ կառավարման և ֆինանսական ենթակառուցվածքները, որոնք ապահովում են էլեկտրոնային առևտրային առցանց համակարգերը։

Սեմինարի ավարտին բոլոր մասնակիցներին շնորհվեցին մասնակցության վկայականներ՝ հաստատելով նրանց ակտիվ ներգրավվածությունն ու ձեռք բերված գիտելիքները տվյալ ոլորտում:

Հայաստանի գործատուների հանրապետական միությունը հետևողականորեն շարունակելու է աջակցել իր անդամների կարողությունների զարգացմանը և տնտեսական արդի ուղղություններով կազմակերպվող կրթական և փորձի փոխանակման ծրագրերում ներգրավվածության ապահովմանը։