Ճանաչողական այց ՖԵՐՄԱ ռեստորան by Green Village

Հուլիսի 13-ին Հայաստանի գործատուների հանրապետական միության նախագահ Վահագն Համբարձումյանը և Խորհրդի անդամ Հարություն Գուլյանը այցելեցին Արարատի մարզի Ղուկասավան համայնքում գտնվող ՖԵՐՄԱ ռեստորան by Green Village համալիր, որն իրենից ներկայացնում է ոչ միայն հանրային սննդի յուրօրինակ վայր, այլև գյուղատնտեսական նշանակություն ունեցող բացառիկ կենտրոն։

Ֆերման հիմնադրվել է 2017 թվականին և ընդամենը 2 տարի անց 80 մ² մակերեսից վերածվել 3200 մ² տարածք զբաղեցնող ընդգրկուն գյուղատնեսական համալիրի՝ դառնալով Հայաստանում ընտանեկան ժամանցի եզակի ուղղություն։

Ֆերման գտնվում է Երևանից ընդամենը 13կմ հեռավորության վրա։  Ֆերմայի տարածքում գործում է խեցգետնաբուծարան, որտեղ արհեստական պայմաններում հաջողվել է բազմացնել ավստրալիական կարմրաչանչ խեցգետին, որն ի սկբանե մասնագետների կարծիքով անհնարին էր թվում։  Բացի այդ, Ֆերմայում գործում է նաև լորանոց, որտեղից թարմ լոր և լորի ձու է մատակարարվում ոչ միայն ռեստորանի խոհանոցին, այլև` առաքվում ամբողջ ՀՀ տարածքում։

ՖԵՐՄԱ ռեստորան by Green Village-ը ոչ միայն համեղ և առողջ սնվելու վայր է, այլև էկզոտիկ կենդանիների ցուցադրության հրաշալի հնարավորություն, քանի որ այստեղ ապրում են 20 տեսակից ավելի էկզոտիկ կենդանի: Այցելուները կարող են հանգստանալ բնության գրկում, երեխաները՝ շփվել կենդանիների հետ, ծանոթանալ նրանց կենսակերպին, իսկ մեծահասակները՝ վայելել ընտանեկան համեղ ընթրիք գյուղական մաքուր միջավայրում։

Նմանատիպ ճանաչողական այցերը շարունակական բնույթ են կրելու` նպատակ ունենալով բացահայտել տարբեր ընկերությունների նորարարական մոտեցումները, բացահայտել ՀՀ արտադրական ներուժն ու առկա հնարավորությունները և ձևավորել գործատուների միջև համագործակցության, փորձի փոխանակման արդյունավետ հարթակ։