Ֆինանսական գրագիտության առցանց դասեր ԼՂ-ից տեղահանված անձանց համար

 Շարունակվում են Հայաստանի գործատուների հանրապետական միության նախաձեռնությամբ իրականացվող Լեռնային Ղարաբաղից բռնի տեղահանված անձանց համար նախատեսված ձեռնարկատիրական կրթության զարգացման ծրագրի երկրորդ խմբի դասընթացները։

Այս փուլում դասընթացներն իրականացվում են առցանց ձևաչափով` նպատակ ունենալով ընդլայնել ծրագրի աշխարհագրական հասանելիությունը և հնարավորություն տալ ՀՀ տարբեր մարզերում բնակվող շահառուներին ձեռք բերելու ձեռնարկատիրական հմտություններ։

Հուլիսի 22-26-ը կազմակերպված դասերը վարեց «Հայաստանի ֆինանսիստների ասոցիացիա» ՀԿ նախագահ, ֆինանսական ոլորտի փորձագետ, տ.գ.թ. Սողոմոն Միրզոյանը։ Թեմաները նվիրված էին բիզնեսի ֆինանսական կառավարման հիմնարար սկզբունքներին, մասնավորապես՝ ֆինանսական պլանավորման կառուցվածքին և նշանակությանը, ինքնարժեքի հաշվարկման մեթոդներին, գնագոյացման ռազմավարություններին, բիզնեսի ծախսածածկման կետի որոշման գործիքակազմին։

Դասընթացի ընթացքում մասնակիցները գործնական առաջադրանքների միջոցով ոչ միայն հնարավորություն ունեցան կիրառելու ստացած գիտելիքները, այլ նաև սովորելու, թե ինչպես կարող են հաշվարկային գործիքներն օգտագործել ռիսկերի նվազեցման և բիզնեսի կայունության բարձրացման համար։

Դասընթացը հագեցած էր ինտերակտիվ քննարկումներով, որոնց ընթացքում մասնակիցները ներկայացրեցին իրենց բիզնես գաղափարները՝ ստանալով անհատական խորհրդատվություն և արժեքավոր գործնական առաջարկներ Սողոմոն Միրզոյանի կողմից։

Ծրագրի առաջիկա դասերի ընթացքում մասնակիցները կուսումնասիրեն բիզնեսի բյուջեի պլանավորման, շուկայի վերլուծության, ֆինանսավորման մեխանիզմների՝ ներառյալ դրամաշնորհների ու ներդրումների, ինչպես նաև ՀՀ-ում ձեռնարկատիրական գործունեությանը վերաբերող հարկային ու իրավական դաշտի հիմունքները։

Հիշեցնենք, որ ծրագիրն իրականացվում է Աշխատանքի միջազգային կազմակերպության (ԱՄԿ) աջակցությամբ՝ «ԱՄԿ լիազոր գործընկերների կարողությունների զարգացում՝ աշխատանքի ոչ ֆորմալ դրսևորումների կանխման և ֆորմալացման անցման խթանման ուղղությամբ, փախստականների հետ կապված ճգնաժամի համատեքստում» նախաձեռնության շրջանակներում։