Ստորագրվեց Հանրապետական կոլեկտիվ չորրորդ պայմանագիրը. սոցիալական գործընկերությունն անցնում է նոր փուլ

Հունվարի 23-ին ստորագրվեց Հանրապետական կոլեկտիվ (եռակողմ) պայմանագիրը ՀՀ կառավարության՝ (ի դեմս ՀՀ աշխատանքի և սոցիալական հարցերի նախարարության), Հայաստանի գործատուների հանրապետական միության և Հայաստանի արհմիությունների կոնֆեդերացիայի միջև:

Պայմանագիրը որակապես նոր մակարդակի վրա է դնում սոցիալական գործընկերությունը պետության, գործատուների և արհմիությունների միջև։ Փաստաթղթով սահմանվում են Հայաստանի Հանրապետության սոցիալ-աշխատանքային և դրա հետ կապված սոցիալ-տնտեսական հարաբերությունների շրջանակում կողմերի միջև համագործակցության ուղղությունները։

Ողջույնի խոսքով հանդես եկան ՀՀ աշխատանքի և սոցիալական հարցերի նախարար Արսեն Թորոսյանը, Հայաստանի գործատուների հանրապետական միության նախագահ Վահագն Համբարձումյանը և Հայաստանի արհմիությունների կոնֆեդերացիայի նախագահ Էլեն Մանասերյանը։ Միջոցառմանն առցանց մասնակցում էին Աշխատանքի միջազգային կազմակերպության (ԱՄԿ) բարձրաստիճան ներկայացուցիչներ Էմանուել Ժուլյենը, Հենրիկ Մոլլերը և Սերգեյուս Գլովացկասը, ովքեր վերահաստատեցին ԱՄԿ-ի լիակատար աջակցությունը սոցիալական գործընկերության զարգացման գործընթացին։

ՀՀ աշխատանքի և սոցիալական հարցերի նախարար Արսեն Թորոսյանը նշեց, որ պայմանագրի շրջանակում նախատեսվող աշխատանքները կունենան իրական և շոշափելի արդյունքներ, որոնք կնպաստեն աշխատողների և գործատուների շահերի պաշտպանությանն ու մեր երկրի սոցիալ-տնտեսական զարգացմանը:

Իր ելույթում ՀԳՀՄ նախագահ Վահագն Համբարձումյանն արձանագրեց, որ պայմանագրի կողմ է հանդիսանում ՀՀ կառավարությունը՝ իր ողջ կազմով և լիազորություններով, ինչը լուրջ երաշխիք է գործատուների համար, որ բարձրացրած հարցերը կստանան համակարգային լուծումներ կառավարության բոլոր մակարդակներում։

«Պայմանագրով ամրագրվում է ինստիտուցիոնալ երկխոսության արդյունավետ մոդել և ստեղծվում է Հանրապետական եռակողմ հանձնաժողով, որտեղ Հայաստանի գործատուների հանրապետական միությունը ստանում է իրական և ազդեցիկ մասնակցություն։ Այսուհետ աշխատանքային իրավունքին և դրա հետ կապված բիզնեսի շահերին առնչվող ցանկացած օրենսդրական նախագիծ կանցնի այս հանձնաժողովի փորձաքննությունը, ինչը թույլ կտա գործատուի ձայնը հնչեցնել որոշումների կայացման ամենաբարձր մակարդակում», - նշեց Վահագն Համբարձումյանը։

Նրա խոսքով՝ պայմանագիրը նաև ուղղված է ապագային․ այն խթանում է գիտելիքահեն և նորարարական տնտեսության զարգացումը, թվային տեխնոլոգիաների ներդրումը աշխատավայրերում, ինչպես նաև գործատուների ակտիվ մասնակցությունը կրթական համակարգում՝ մասնագիտական ուսումնական հաստատությունների կառավարման և աշխատանքի վրա հիմնված ուսումնառության միջոցով։

ՀԱՄԿ նախագահ Էլեն Մանասերյանն էլ իր հերթին ընդգծեց, որ սոցիալական գործընկերությունը պետության, գործատուների և արհմիությունների միջև ոչ միայն համագործակցության ձևաչափ է, այլև կայուն զարգացման, սոցիալական արդարության և արժանապատիվ աշխատանքի երաշխիք։

Վահագն Համբարձումյանը շնորհակալություն հայտնեց բոլոր կողմերին այս կարևոր ռազմավարական համաձայնությանը հասնելու համար, ինչը վկայում է փոխադարձ վստահության և կառուցողական երկխոսության մասին։

Հայաստանի գործատուների հանրապետական միությունը շարունակելու է լինել բիզնեսի շահերի պաշտպանության և տնտեսության կայուն զարգացման առաջամարտիկը։

https://www.youtube.com/watch?v=DaBWYAMJ9EU

https://www.youtube.com/watch?v=T7H-Xtho5iA