Միության ներկայացուցիչը` exim հարթակի բացմանը

Ապրիլի 28-ին ՀՀ պետական եկամուտների կոմիտեում կայացավ EXIM հարթակի պաշտոնական բացման արարողությունը, որին մասնակցում էր նաև Հայաստանի գործատուների հանրապետական միության փորձագետ Անի Մերթարչյանը։

EXIM հարթակը միտված է մաքսային գործընթացների թվայնացմանը և գործարար միջավայրի բարելավմանը՝ նպաստելով արտաքին տնտեսական գործունեության և լոգիստիկ գործընթացների առավել արդյունավետ կազմակերպմանը։

Միջոցառման ընթացքում ներկայացվեցին հարթակի հիմնական գործառույթները, կիրառման մեխանիզմները, ինչպես նաև բիզնես գործընթացների պարզեցման և թվային լուծումների ներդրման ուղղությամբ ակնկալվող արդյունքները։

ՀԳՀՄ-ն կարևորում է պետական և մասնավոր հատվածների միջև համագործակցության զարգացումը, ինչպես նաև բիզնես գործընթացների արդիականացմանն ուղղված նախաձեռնությունները։

* ExIm-ը թվային լուծումներով ստեղծված միասնական տեղեկատվական հարթակ է, որը նախատեսված է արտաքին տնտեսական գործունեության մասնակիցների համար` արտահանման և ներմուծման գործընթացները դարձնելով առավել հարմարավետ, կանխատեսելի և արդյունավետ։ ExIm-ը գործում է «մեկ պատուհանի» սկզբունքով՝ մեկ վայրում համախմբելով արտաքին տնտեսական գործունեությանը վերաբերող ամբողջ տեղեկատվությունը։ Սա նշանակում է, որ բիզնեսը կարող է արտահանման, ներմուծման և տարանցման գործընթացների վերաբերյալ անհրաժեշտ տվյալները համակարգված ստանալ հասկանալի ձևաչափով՝ առանց տարբեր պետական մարմիններում և աղբյուրներում տեղեկատվություն որոնելու։