Փոխվարչապետի գլխավորությամբ տեղի ունեցավ հարկային վարչարարության արդյունքում քրեական վարույթների նախաձեռնման պրակտիկայի վերաբերյալ քննարկում

Դեկտեմբերի 17-ին փոխվարչապետ Տիգրան Խաչատրյանի գլխավորությամբ պետական գերատեսչությունների և մասնավոր հատվածը ներկայացնող միությունների ներկայացուցիչների հետ տեղի ունեցավ քննարկում հարկային վարչարարության արդյունքում քրեական վարույթների նախաձեռնման պրակտիկայի վերաբերյալ։

Քննարկմանը մասնակցում էր նաև Հայաստանի գործատուների հանրապետական միության նախագահ Վահագն Համբարձումյանը։

Հանդիպման ընթացքում մանրամասն անդրադարձ կատարվեց հարկային վարչարարության իրականացման տարբեր փուլերում լրացուցիչ հարկային պարտավորությունների առաջադրման դեպքերում Պետական եկամուտների կոմիտեի հաղորդումների հիման վրա տնտեսավարողների նկատմամբ քրեական վարույթներ նախաձեռնելու գործընթացին։ Մասնավորապես՝ գործարար միությունների ներկայացուցիչները մտահոգություն հայտնեցին, որ գործընթացի արդյունքում որոշ տնտեսավարողների համար առավել նախընտրելի է դառնում առաջադրված պարտավորությունների չվիճարկումը՝ քրեական պատասխանատվության հեռանկարից խուսափելու նպատակով։

ՀԳՀՄ նախագահ Վահագն Համբարձումյանը փոխվարչապետ Տիգրան Խաչատրյանին հիշեցրեց Ջերմուկի «Գործարար միջավայրի բարելավումը երկխոսության միջոցով» աշխատաժողովին իր կողմից ներկայացված առաջարկը, համաձայն որի քրեական վարույթի համար նշանակություն ունեցող տվյալները պետք է վերցվեն այլ կրիչի վրա պատճենելու եղանակով՝ ապահովելով այդ տվյալների և դրանցից կատարված պատճենների ամբողջականությունը, իսկ էլեկտրոնային սարքերը կամ կրիչները վերցնելուց հետո դրանք պետք է հանձնվեն (վերադարձվեն) օրինական տիրապետողին՝ տվյալները պատճենելուց ոչ ուշ, քան 3 օրվա ընթացքում: Փոխվարչապետն ընդունեց առաջարկը և նշեց, որ այն անպայման հաշվի կառնվի օրենսդրական փոփոխությունների մշակման գործընթացում։

Պատասխանատու գերատեսչությունների կողմից ներկայացվեցին այս խնդրի ուղղությամբ արդեն իսկ իրականացված և ընթացիկ աշխատանքները, ինչպես նաև հարցի կարգավորման լրացուցիչ առաջարկներ, այդ թվում՝ լրացուցիչ պարտավորությունների առաջադրման շեմի փոփոխության, ստուգման ողջամիտ ժամանակահատվածի սահմանման, ինչպես նաև հաղորդում ներկայացնելու համար հարկային պարտավորություններից խուսափելու հանցակազմի առկայության պարտադիր պայմանի սահմանման վերաբերյալ։ Անդրադառնալով խնդրի կարգավորման հնարավոր եղանակներին՝ փոխվարչապետը կարևորեց այնպիսի լուծումների ներդրումը, որոնք հարկային կարգապահության ապահովմանը զուգահեռ չեն խոչընդոտի գործարարների կողմից իրենց իրավունքների պաշտպանության լիարժեք իրացմանը։

Հանդիպման արդյունքում ձեռք բերվեց պայմանավորվածություն՝ շարունակելու խնդրի կարգավորման համար անհրաժեշտ գործողությունների շուրջ քննարկումները՝ 2026 թվականի սկզբին դրանք ամփոփելու և առաջիկա քայլերը համաձայնեցնելու նպատակով։