Աշխատանքի միջազգային կազմակերպությունը (ԱՄԿ) ՄԱԿ-ի մասնագիտացված գործակալություն է, որի նպատակն է սոցիալական արդարության սկզբունքների և միջազգայնորեն ճանաչված մարդու իրավունքների ու աշխատանքային իրավունքների խթանումը։ Հիմնադրված լինելով 1919թ.` 1946թ. ԱՄԿ-ն դարձավ ՄԱԿ-ի առաջին մասնագիտացված գործակալությունը:

ԱՄԿ-ն ունի չորս հիմնական ռազմավարական նպատակ.

1. խթանել և կյանքի կոչել աշխատանքի ոլորտում հիմնարար սկզբունքներն ու իրավունքները.
2. ընդլայնել տղամարդկանց և կանանց հնարավորությունները՝ ունենալու արժանապատիվ զբաղվածություն.
3. ընդլայնել սոցիալական պաշտպանության ընդգրկումն ու արդյունավետությունը բոլորի համար.
4. ամրապնդել՝ եռակողմությունը (կառավարության, գործատուների և աշխատողների համագործակցությունը սոցիալ-աշխատանքային հարցերի լուծման մեջ) և սոցիալական երկխոսությունը:

ՄԱԿ-ի համակարգում՝ ԱՄԿ-ն ունի յուրօրինակ եռակողմ կառուցվածք։ Կազմակերպությունում քաղաքականության և ծրագրերի վերաբերյալ որոշումներ կայացնելիս գործատուների և աշխատողների ներկայացուցիչները կառավարության ներկայացուցիչների հետ ունեն հավասար ձայնի իրավունք: ԱՄԿ-ն նմանատիպ եռակողմ համագործակցությունը խրախուսում է նաև ազգային մակարդակում։ ԱՄԿ-ն սահմանում է միջազգային աշխատանքային ստանդարտներ Կոնվենցիաների և հանձնարարականների ձևով:
Հայաստանը ԱՄԿ-ին անդամակցում է 1992 թվականից: Հայաստանում ԱՄԿ-ի գործունեությունը համակարգում է ԱՄԿ-ի Արժանապատիվ աշխատանքի տեխնիկական աջակցության թիմը և Արևելյան Եվրոպայի ու Կենտրոնական Ասիայի երկրների գրասենյակը:
Աշխատանքի միջազգային կազմակերպությունը (ԱՄԿ) 1919 թվականից ի վեր միավորում է 187 անդամ երկրների կառավարություններին, գործատուներին և աշխատողներին՝ սահմանելու աշխատանքային չափանիշներ, մշակելու քաղաքականություն և ծրագրեր:

2008թ.-ից ԱՄԿ-ի և ՀԳՀՄ-ի համագործակցությունն իրականացվում է հետևյալ ուղղություններով.

1. ԱՄԿ կոնվենցիաների պահանջների կատարման աջակցություն և մշտադիտարկում,
2. Սոցիալական եռակողմ գործընկերության խթանում,
3. Կանանց և տղամարդկանց հավասար իրավունքների պաշտպանություն և հնարավորությունների ստեղծում,
4. Արժանապատիվ աշխատանքային միջավայրի ձևավորում,
5. Աշխատանքի անվտանգության և պաշտպանության ապահովում,
6. Երիտասարդության զբաղվածության խթանում,
7. Փոքր և միջին բիզնեսի, ինչպես նաև կանանց ձեռնարկատիրության աջակցություն,
8. Աշխատանքային միգրացիոն քաղաքականության զարգացում,
9. Կանաչ տնտեսության և կանաչ աշխատատեղերի բարելավում,
10. Ֆորմալ տնտեսության խթանում,
11. Կայուն ձեռնարկությունների համար բարենպաստ միջավայրի ստեղծում,
12. Մասնագիտական կրթության շարունակական բարելավում,
13. Հաշմանդամություն ունեցող անձանց ինտեգրման խթանում աշխատաշուկայում,
14. Աշխատանքի վայրում բռնությունների և ոտնձգությունների կանխարգելում։