Հարկային համակարգի և բյուջեի պլանավորման դասընթացներ` ԼՂ-ից բռնի տեղահանված անձանց հսմար

 Հայաստանի գործատուների հանրապետական միությունը (ՀԳՀՄ) շարունակում է իրականացնել Լեռնային Ղարաբաղից բռնի տեղահանված անձանց համար ձեռնարկատիրական կրթության զարգացման ծրագրի երրորդ խմբի դասընթացները։  Ծրագրի երրորդ փուլն անցկացվում է հիբրիդ ձևաչափով՝ համատեղելով ինչպես առկա, այնպես էլ առցանց հանդիպումները։

Ծրագրի շրջանակներում օգոստոսի 26-28-ը կազմակերպված դասերը վարեց ՀԳՀՄ Խորհրդի անդամ, տնտեսագիտության տեսաբան, ֆինանսիստ Միհրան Թադևոսյանը։ Դասերի ընթացքում մասնակիցներն ուսումնասիրեցին կազմակերպության հաշվեկշռի կառուցվածքը, եկամտի և ծախսերի ձևավորման սկզբունքները, շահութաբերության ցուցանիշները, ինչպես նաև ծախսերի դասակարգման մեթոդաբանությունը՝ ըստ տարրերի, գործառույթի, բնույթի և վարքագծի։ Հատուկ ուշադրություն դարձվեց արտադրական և ոչ արտադրական ծախսերի կառավարման մեխանիզմներին, շահույթի հաշվարկման գործիքակազմին և բիզնեսի ֆինանսական կայունության բարձրացման հնարավորություններին։

Դասընթացավար Միհրան Թադևոսյանը մասնակիցներին ներկայացրեց նաև հարկային օրենսգրքի հիմնական դրույթները, հարկման ընդհանուր և հատուկ համակարգերը, ավելացված արժեքի հարկի (ԱԱՀ), շահութահարկի, եկամտային հարկի, պետական և տեղական այլ հարկատեսակների առանձնահատկությունները, շրջանառության և միկրոձեռնարկատիրության հարկման համակարգերը, ինչպես նաև հարկային պարտավորությունների հաշվարկման ու վճարման կարգերը։

Դասերի ընթացքում կազմակերպվեցին ակտիվ քննարկումներ, որոնց ընթացքում մասնակիցները հնարավորություն ունեցան ներկայացնելու սեփական բիզնես գաղափարները և ստանալու անհատական խորհրդատվություն Միհրան Թադևոսյանի կողմից՝ դրանք արդյունավետ իրականացնելու ուղղությամբ։

Հիշեցնենք, որ ծրագիրն իրականացվում է Աշխատանքի միջազգային կազմակերպության (ԱՄԿ) աջակցությամբ՝ «ԱՄԿ լիազոր գործընկերների կարողությունների զարգացում՝ աշխատանքի ոչ ֆորմալ դրսևորումների կանխման և ֆորմալացման անցման խթանման ուղղությամբ, փախստականների հետ կապված ճգնաժամի համատեքստում» նախաձեռնության շրջանակներում։